最緊要鮮@尚上下夏養生雞煲火鍋

一大班人食飯，我最鐘意圓枱，圓枱最好打邊爐。細個時打邊爐最鐘意去任食，因為平又一定飽，人大左，食唔到咁多，到開始講求食物質素，貴精不貴多，呢個道理宜家終於開始明。

朋友當日提議去尖沙咀山林道「尚上下夏養生雞煲火鍋」，試下新野先!

鋪面唔算太，主要係四至六人枱，我地果日成八個人，就座係中間既大枱。雖然得一張大枱，但一D都唔迫。我覺得佢既裝修有點似CAFE，多過似火鍋店，但咁様又幾有HOME既感覺。

等人齊，食住前菜「溏心皮蛋豆腐」先，皮蛋係糖心的，豆腐夠滑有豆味，皮蛋迷唔好錯過。

呢度食雞煲，除左選幾麻幾辣之外，仲可以選擇雞的部位，雞胸定雞脾都可以由自己決定。

由於唔係個個食辣，所以我地選左一邊小辣一邊唔辣，辣中帶甜，容易入口。除外雞之外，配菜仲有好吸味既豬皮，如果你鐘意食辣，一定要吃，精華所在。

市面多數的雞煲都係加湯時都係用豬骨湯，但呢度就有好幾種既選擇。我地選擇左「足料龍蝦湯」同「養生藥膳湯」。初時，我地都有D擔心會唔會唔夾原本雞煲既味道，原來係無問題架喎，仲可以食到兩種湯底既味道。

最緊要鮮~首位:海鮮。呢度既海鮮十分正，帶子皇鮮甜、花竹蝦彈牙、桶蠔肥美、班片厚實。加上價錢實際，實在值得推介。

最緊要鮮~第二位:牛拼盤。High Tea先會出現既田園層架，竟然唔係放cupcake，要來放牛肉又幾方便慳位喎!!呢個拼盤有齊牛的唔同部位，牛肉既質素唔錯，柏葉唔韌。

平時愛牛的我，覺得呢兩碟豬更出色。花腩片熟後十分爽脆，黑豬肉片鮮味得來又軟熟。推介!

鬼馬墨魚好好食，反轉墨魚果面滾一二分鐘，即既時候又脆又滑，口感好有趣。招牌貢丸來自台灣，堅好食!!自家製響玲好新鮮，即叫即炸，一上枱已經聞到香味。

什菰籃及什菜藍無特別但打邊爐必備。

雖然好飽，但女人食甜品有第二個胃，鮮奶凍滑得來唔甜。最後仲毎人送左杯果醋，啱晒要來解膩。