水都可以卸得好乾淨@CNP LABORATORY 泉露清爽卸妝水

其實呢幾年，我地真係俾韓風影響得好緊要，除左電視，音樂之外，最勁莫過於「美妝」同「護膚」。大家真係可以數數用緊既產品有幾多係來自韓國，我自首先，我有一半以上。好似我學化妝既老師咁話，韓國d野又平又好用，點可以唔買呢!所以今次我又來介紹一支來自韓國既卸妝水-CNP Aqua Refresh Cleansing Water 。

其實以前我一直都好少用化妝水，因為成日覺得唔乾淨。但當我對卸妝油開始敏感，再加上當上化妝師後，出job有時要幫d客落妝，就真係用多左卸妝水。我一直都用開紅水，大家都唔會陌生，但試完呢支之後，我好大機會轉投!!!點解??一陣話你知!!

CNP既卸妝水分左「清爽型」同「滋潤型」，適合唔同既膚質。

而佢入面有三様野「不含」，包括「不含人工色素」、「不含人工香料」及「不含防腐劑」

除左可以「卸妝」，仲可以「去角質」同含有從蘋果中提煉的「生物酵素組合成份」

雖然我唔係日日化全妝，但我日日都會搽防晒，所以頭幾日我主要係要來落防晒，搽完係完全feel到防晒無左!

佢講明係卸妝水，咁最重要梗係測試佢既卸妝能力，當日我化左全底妝，再加防水防油眼線同防水防油既霜妝眼影。

我用左三張化妝棉，倒滿卸妝水，再底面咁抺左幾次，底妝，眼線同眼影基本已經落晒。呢個係我好滿意外，因為平時用紅水真係唔係好卸到防水既野。

呢度就我果三張化妝棉，真係抺到d彩妝落來。

大家可以睇到，第1到第3張都真係好明顯。不過大家記住，要抺到張化妝棉無野，先至係落好架!

另外，我選左兩支呢期大熱既鮮色唇膏，試驗下佢落唔落到。係我抺第一次既時候，基本上已經抺左5成既唇膏，再抺多次，就得返少少印。呢支卸妝水既清潔力真係強。

好!!到大家最難落既睫毛液，我又選左兩支出名難落既，來考驗下佢。由於呢個係睫毛液，所以我先敷左十秒左右再抺。第一輪既時候，KISS ME已經得返一成，而MJ只係落到丁丁。到第二輪既時候，KISS ME已經唔見晒，但MJ都仲有大半。

總括來講，我係好鐘意呢支卸妝水，亦係我轉頭既原因。

首先，佢既清潔能力非常之高，一般返工既妝包括防水防油眼線，部份既睫毛液都可以落得乾乾淨淨，未必需要用眼唇卸妝液。

第二，佢既清爽度非常好，用完之後，皮膚唔會負擔，用清水輕輕過感覺更暢快。

第三，佢既防敏度唔錯，可能同佢係醫學品牌好大關係。試用之前，我額頭起左D敏感，用佢除左無「拿」無唔舒服外，我既敏感亦有消退既跡像。




產品由品牌提供

去紋變左去暗沈@女人做機真係好重要2

 我最新「確診」我左眼果條原來「淚溝」，已經唔係眼紋咁簡單，除非打針，否則.........唔會完全解決到。平時我都做RF機，都幫到下手，起碼果兩個星期條「淚溝」唔會咁明顯。

但人總是身痕，朋友介紹我試下野，我又走去試!即管睇下有無效。今次試「光機」，姊姊話對付乾燥紋同暗沉效果明顯d，至於我條「淚溝」，佢話未必會見到效果，算佢老實啦。

其實做FACIAL真係好難影相，所以我全部都鬥雞眼，所以加晒特別效果........

話說都一般段時間無做機，對眼確實攰，不過我一直唔太在意黑眼圈，因為我咁黑.....哈哈哈!自欺欺人!!!

基本清潔完，要敷一層好凍的GEL以免燒傷。

之後就開始係眼部唔同既位置打光，都真係幾光下同有少少熱，所以要遮一遮，一面大概四五下度啦!

打完姊姊話無咁暗，我訓係度其實睇唔到!!哈哈!宜家睇返又的確係!!

之後梗係敷返個EYE MASK做濕一下，訓一個覺先!

敷埋個MASK，效果就真係明顯好多，眼肚條紋又真淡左喎!!

上面果兩張係做前做後同一個位置影既，下面就行左出光D既地方影。其實去乾紋既效果係有D令我覺得意外，出左光既地方我都忍唔住講左句「其實都幾明顯」，而我好習慣既黑眼圈原來真係會有分別!!

說實在，要對付我條千年「淚溝」RF確實好D，但如果係對付黑眼圈、暗沉同乾紋，「光機」一次都見效!所以大家都可以針對自己既需要，輪流去做，改善下!!

呢間美容環境服務都幾好，起碼姊姊夠老實，唔會誇張部機既功效，港島區人士可以考慮。

「阿女去那兒」媽媽自由行@宜蘭礁溪、羅東 --- 第二天

浸完温泉真係好好訓，第二朝民宿有自助早餐提供，都係地道既清粥小菜。食完之後，同民宿主人的媽媽傾左一陣，佢人好好，唔只邀請我地上樓上參觀，仲請我地食古早味既花生糖。原來奇立丹上層本來係餐廳，之前可以俾人來食晚飯，可惜老闆覺得太嘈，令到住既客人唔可以好好休息，就無所做了，台灣人營商，除左錢，仲好有堅持，呢個我真係好欣賞。餐廳外有一個好大既平台，天氣好既時候可以睇到龜山島，可惜....十二月的天氣灰濛濛。

十一點鐘交房後，請民宿主人車我們到火車站，在火車站旁邊就有「台灣好行」的接駁車，免費接駁附近的景點。(記住架車因為未夠鐘停係對面，上車位係我影相既位置)，平日大概一個鐘頭一班。只要就返D時間，可以慳唔少的士錢。

 我諗大概二十分鐘度，就到左第一個景點「蘭陽博物館」。

 佢既設計好特別，環境好廣闊，太后見到係咁影相。不過當日真係落住毛毛雨又凍，影左一陣都要入室內。

「蘭陽博物館」的展館內容，簡單而言就係「宜蘭的故事」有D似香港歷史博物館咁，未去過既我覺得值得一去，可以更了解宜蘭既風士人情。我地大概係入面行左個多鐘頭，就係入面既CAFE食埋午餐，咁啱仲有少少時間，所以係博物館附近行左一陣，原來烏石港就係旁邊，夏天去嘗鯨就係呢度，可惜......要等下次先去到。

從另一個角度去睇「蘭陽博物館」都真係好靚。我覺得呢度都幾啱帶太后去，一來室內，二來睇下又可以行下座下，唔會太攰。

行完之後，只要向前行再過返對面呢間臭豆腐門口就可以等返「台灣好行」既車返礁溪。其實附近仲有頭城老街，不過因為要去羅東，所以就無去了。

由於礁溪都係一個好多火車會經既站，我之前睇班次以為好晏先有車，點知一去到就有，簡直用衝上車來形容，所以去到火車站，只要買飛時同佢講去邊，佢地就會話到俾你知幾時上車。

去到羅東火車站，簡直係另一個感覺，就好似係荃灣出左旺角咁。今晚要住既民宿係「幸褔三百米」，民宿主人接左我地返去後，由門口開始，你已經感覺到「温暖」兩個字。

民宿入面既所有既佈置都係民宿主人倆夫婦一手一腳所設計。呢到呢度，真係會讓人思考「家」應該係點!!呢個家好温暖!

 廚房旁邊有部汽水機，大家可以隨便拎來飲。

就算梯間，佢地都一絲不苟。

 我地住既係「三百米」，房間真係好夢幻，而主人亦好貼心地寫左歡迎字句。媽媽好鐘意，好似變返小女孩咁，我諗毎個女人心入面都住左一個小女孩，係適當既時候就會出現。不過民宿係要上樓梯，媽媽就有D辛苦了。

民宿主人好好，佢預備地夜市既地圖，細心地介紹值得嘗試既美食同路線，等我地唔洗怕賣晒，又唔會行多路。

五點幾民宿主人就幫我地CALL的士出發去夜市，其實十分鐘度就到，呢個夜市真係好正，又大又多野食!當中要推介梗係地道既「三星蔥餅」，仲有好食過「豪大大」既「貴族雞排」，而圖中既食物真係全部都好好食!! 仲有杯烤庶汁，真係超好飲(有兩檔，舊D果檔好味好多，唔好買錯)，香港飲唔到!大家要試試!

呢晚我地大概八點幾就返到民宿。夜市係台灣既特式，一定要去，但如果同太后去，就唔好晚晚啦!因為邊行邊食，無得座，太后都有幾攰。