我發現我身邊好多有化妝習慣既女仔，都無定期洗化妝掃既習慣!!!其實你地知唔知道，有研究話，唔洗既化妝掃同粉樸其實等同廁所板既含菌量!!!係廁所板呀!!!!即係我地日日拎塊廁所板搽自己塊面，都咪話唔恐怖。而作為化妝師既我，更加唔敢抬慢，否則D客一敏感，真係化到幾靚都無用。
正常來講，通常大家都係得一套化妝掃，如果要日日大洗等佢乾，其實無咩可能。所以我首先介紹「快洗清潔劑」。
以前用過有化學同酒精成份既洗掃劑，的確好快乾，但氣味真係好刺鼻，頂唔順無用了。
而JANE IREDALE呢支純天然成份，噴完會有淡淡既西柚香味，好舒服!而佢既潔淨能力都好高，同埋有消毒功能。雖然無化學果D咁快乾，但時間都唔算長。
呢支通常我JOB出會用，係客與客之間噴一噴，再用紙巾抺一抺，整得其他野來，就已經乾左，就算之前用左深色眼影，都唔怕影響下個客。
而大家就可以早上化完妝，噴兩下再在紙巾上擦走化妝品，平放係枱面，第二朝又可以用返。
如果可以既話，一至二個星期最好就大洗所有化妝掃一次。化妝掃通常分為「動物毛掃」同「纖維掃」，洗呢兩種掃通常我會用唔同既野去洗。
「動物毛掃」好多人都會用洗頭水去洗，但我既化妝老師話宜家既洗頭水太多化學物質，有時會太柔潤，會影響支掃既抓粉能力，所以我通常都會用返專門既洗掃水去洗「動物毛掃」。
近期用緊既係3CE既洗掃水，只要拎隻小杯出來，因應掃既大水，倒出可以浸到掃毛既份量，然後將支掃放入去打圈，之後拎支掃係抺手紙上面掃乾，掃到無晒顏色就可以。通常我會洗左D淺色既顏色先，咁就可以多幾支先換水。
3CE呢支洗掃水都幾好用，放支掃落去，好快就溶解到D化妝品，加上得少少香味，只要用完拎去沖水，再放係枱面風乾就可以。
「纖維掃」通常都係用膏狀產品既時候用，即係粉底掃、遮瑕掃、眼線掃同唇掃等。通常要洗膏狀既野要洗得乾淨，都係要「濕洗」。
我用既係專業既洗掃梘，大概都要二百幾蚊一塊，其實我知道好多名化妝師都係用勞工梘，所以大家可以按返自己既預算去決定。
濕洗時，最煩係要掃到D掃乾淨，如果只係用手，真係有排攪，所以大家可以去文具鋪買塊洗畫筆既洗掃板。首先沖濕支掃，然後點落舊梘度，再細細力係洗掃板上面來回掃，重複以上直至無晒顏色咪就可以過水等乾。
提提大家，洗掃既時候，沖水唔好高過銀色既地方，同埋要順毛既方向沖，否則支掃好易脫毛同D毛會沖壞架!
洗晒D掃後，記住拎乾淨既毛巾先印乾，再「平放」係枱面風乾，咁就得架啦!如果天氣好，通常一晚都會乾，纖維掃通常要多少少時間，特別係D高密度既粉底掃。
如果大家想化個靚妝，記住要定時洗掃啦!!否則，皮膚敏感時就幾好既化妝品都幫你唔到啦!
