好味又抵食＠東大門

如果去開旺角既朋友，一定會見過東大門的招牌，因為佢就係地港鐡站出口。東大門真係細細個就已經食過，可以係旺角屹立到今天，實有佢個人之處。

朋友約係呢度食飯，上到去真係有點意外，原來佢已經全新裝修，我仲以為佢仲係港式韓燒格局。裝修之後，環境真係舒服好多。

外面有2個大雪櫃放熟食，包括各式炸物、壽司、餐湯及泡菜等。味道都不錯，仲保持得幾乾淨整潔。飲品係唔同既位置都有，方便大家自已拎。另外，都有生菜，大家可以夾肉食，無咁heavy，健康好多！

以前食韓燒，大家都要望實個出菜位，之後九秒九咁去拎刺身。呢度就唔洗，只要大家排隊就可以，可能份量好充足，所以基本上唔洗點排隊已經拎到，三文魚刺身好新鮮，當晚食左好多碟。

燒肉方面則用紙點，我幾鐘意咁樣order，既可以保持新鮮度，亦唔會眼闊肚窄，食晒先點。

各種食材，睇到個樣都知新鮮，而調味亦適中，唔會太濃，就算無調味的肥牛及黑豚肉，都好好食，無雪味。朋友話無調味既肉無咁肥，所以可以食多D 喎！

以前食韓燒真係好怕個油壺，呢度轉用噴嘴式，既方法又慳油，又係唔洗咁肥！哈哈哈！雖然heavy，但咁又可以健康丁丁了！呢度服務既姐姐都好好，見我地個鐵板就燶，就主動同我地換。

海鮮拼盤好似係送，個燒蜆超好味。一定要食！

食燒肉點可以無燒酒。呢支柚子味既燒酒，比一般燒酒易入口好多，啱晒女仔飲！！

東大門只係百多二百元，已經食到好飽，我覺得比平時既放題更抵食，加上環境大大提升，下次想食燒肉時，真係會即刻諗起呢度！

閨蜜談天說地好去處@The Grill Room

又到姊妹飯聚的時間，朋友提議到CWB一間以慢烤為主的The Grill Room。

一入內燈光雖然較暗，但眼前的招牌十分吸晴，雖是平日，但都有八九成客。而座位間不會太迫，可以放心地談心。

我地被安排座於旁邊的高檯，平日很怕座檯，但這裡的高椅卻座得幾舒服，亦不會有就跌就跌的感覺。

原來逢星期四係Ladies night ，所以毎叫一個set dinner就會送一杯汽酒，要來送頭盤啱啱好。

「巴馬火腿温泉蛋配黑松露筍沙律」露筍本是清淡，配上火腿的咸香及蛋汁的幼滑，很開胃。

「炭燒美國安格斯肉眼配薯泥雜菌」

我們都不是太吃生的女生，叫了七成熟，上枱後，雖然還是粉紅色，但肉質有點over cook偏硬了。

「朱古力布朗尼配法式馬卡龍」賣相精緻，Brownies很好味，香濃但不會死實，配著雪糕吃，超級正!

「Salted Caramel」超喜歡的一杯飲品，焦糖一般都會太甜，但混入了海鹽的味道後，的確特別。第一吸先會喝到焦香的香甜，海鹽的咸味則是after taste!  

灣仔精緻小菜@唐宮

一年一度約大學老師食飯。與師長食飯，總覺得中菜是首選，再加上圓枱方面傾偈，找了找，被唐宮的晚飯送乳鴿的優惠吸引加上地點適中，就決定試試佢。

「龍騰小瓜籃」翠玉瓜~一上台不禁嘩聲四起。酸辣汁配上翠玉爪不單爽口，更覺惹味。推介!

「蓬萊素鵝」素鵝十分香脆，入面是切成的蔬菜，不太油膩!

「沙薑豬手」同一般見到有點不同，加上唐芹菜、花生等配料，吃起來多了一重口感。

「三果燉太和雞」用木瓜、雪梨、蘋果去燉烏雞，超級清甜而不膩，沒有一點油。我最愛飲湯，飲左好多碗。

「唐宮金獎乳鴿」是送的，不過好好食喎!連骨軟到可以食埋，經理同我地講，原來佢地自已有鴿場，所以可以控制到大小。

「金花尾兩食」翡翠炒球、椒監球腩，一上台嘩聲四起，超級大碟之餘，仲成幅畫咁，勁吸晴。

翡翠炒球無骨又勁滑，啖啖肉。
椒監球腩鐘意香口同食骨就好啱啦!

最後來一客美點雙輝、分別係「大吉大利」及「一品燒鵝酥」
「大吉大梨」係外型似甜點，咬開原來係蝦餃、蝦餃皮混入了桔子一同製作，吃起來帶點桔子的香味，除與蝦肉出奇地夾之外，仲十分清新。
「一品燒鵝酥」好懷舊的造型，好似細個去酒樓食既點心咁，入面係炒燒鵝絲，幾特別。

抵食之選@雷橋燒肉日本料理 Kaminaribashi

雷橋已經去過幾次，在日式燒肉放題中，它稱得上抵食之選。入門口即見到「雷橋」2個大字，四週充滿日式擺設。

雖然主攻燒肉，不過放題又點少得刺身呢！呢隻刺身船超級對版，三文魚肥美，吞拿魚、鯛魚也新鮮。

我地選左幾款牛肉，包括牛舌、牛胸腹、牛柳粒等。各個部分都有唔同既味道。

肉片較薄，所以用細火慢燒會較好。除左各款牛內之外，其實仲有好多野食，包括豚肉、香腸等。

除左燒肉之外，仲有好多日式前菜，啱晒食到攰時，過下口癮。食左咁多牛肉，又點少得食返沙律中和下。

如果要食日式燒肉，雷橋真係抵食之選，最適合一大班朋友gathering!

鮮@鉄人旨花 Shika Teppan-Yaki

今晚阿sir請食飯，佢話帶我去食一間「唔一定會飽，但一定好食」既日式餐廳。
聽完佢咁講，真係滿心期待。

「和牛刺身盛合」包括宮崎霜降牛、季節魚2種、季節生蠔2隻、海膽及赤貝。　

季節生蠔係「北海道生蠔」配上酸汁及啫喱。生蠔蠔身極之飽滿，充滿光澤，一看便感覺到鮮。

北海道蠔海水味不重，配上酸汁及啫喱，提升了蠔的鮮味，吃完真的很想多吃一隻。

「宮崎A5霜降牛」看上去以為冷冰冰，但一夾已感覺到肉質的鬆軟，配上特質的酸汁，牛肉的味道立刻衝出來，「入口即溶」原來係真係會出現的。

這個酸汁，單獨食係超級酸，但配上和牛，中和了油脂，卻啱啱好。 

鰹魚和赤貝完全沒有鯹味，帶點鮮甜，很滿足。

「北海道海膽」高質素的海膽一吃便知，反之則是怪味伴隨。這裡的海膽吃很出海水的味道。

「廚師精選壽師12件」由廚師發板的時令壽師。有吞那魚、赤貝、三文鮮、海膽、三文魚子等。

日本壽司要好吃，其實都離不開「新鮮」二字，這裡真的是我在香港吃過很「新鮮」的頭幾間。

壽司飯已經調好味，而魚生很鮮，根本不用點豉油，也不用點芥末。

偶遇的美味小店＠潮樂園

媽媽忽發奇想，想到公公以前工作的地方看看，結果我們便來到北角。行左一輪，到了晚飯的時間，我們本來只想入去吃碗麵，點知入去睇睇下原來係打冷食，忍唔住叫左2個餸。

我食既時候，時間尚早，點知一食完，門口勁多人等位。

呢碟鵝片拼墨魚，一上枱已覺覺香滷水味，之後見到鵝肉帶點粉嫩的顏色，即刻放晒心。

鵝片厚薄適中，熟度剛剛好，加上很香的滷水味，食得很過癮。

伴菜的豆腐也很入味，不錯!!

「花鵰醉香鴨舌」媽媽喜愛吃鴨舌，難得小店有供應，就試試它。

花鵰酒香味很重，吃起來卻不覺濃，唔飲酒的人都可以試下。再配上杞子，多了一份香甜。

鴨舌雖然夠軟，但如果可以再入味一點，便會更好。

「韭菜豬紅」超級好吃，豬紅沒有怪味，而且結實，不會一夾就散，而調味帶點辣度，很惹味。

最後，還是來一點正餐，崩沙牛腩麵，牛腩入味沒有渣，湯底有明顯的大地魚味，好食!

最後，喜愛吃辣的你，一定要試試這小店的辣椒油，味香辣度夠。

不一樣的台北@Check-In Taipei

台北是香港人的後花園。雖然啱啱係台北返來，但還是很掛念。朋友見我咁既樣，揾左間特式台菜俾我試。

講真一去到，完全FEEL唔到係賣台菜，同中環既酒吧一樣。

朋友話呢度既大廚曾經係米芝蓮三星工作，所創作的都係創意台菜。

呢杯外表咁清新既其實係「愛玉」，毎次去台灣我都要飲過青蛙下蛋。

Ai－YU Lemon Green 淡淡的綠茶，加上大量的愛玉，很有茶味，也不會過甜。雖然也是檸檬愛玉，但是加了綠茶就多了一個層次。

「Chicken Waffle, Pork Knuckle, Ping Pong」一上枱真是眼前一亮。

ChickenWaffle 鹽酥雞配上波蘿及鬆餅。除了鹽酥雞超級脆之外，配上菠蘿減退左油膩感。

Pork Knuckle 台灣人也很愛吃，我自己就很少吃，豬手很入味，肉質十分軟熟，配上脆脆的米餅，口感衝突卻配合。

Ping Pong 其實係紫薯波波，流心紫薯充滿薯香，甜甜的。好食!

「Pork Belly & Puree, House Calamari, Sweet & Sour Fish」，又是三小碟，不過與前菜相比，口味是重一點。

House Calamari 椒鹽花枝本身已極喜愛，這裡的花枝是軟軟的，不會過硬，剛剛熟而有咬口，配上薄薄的炸漿，十分惹味。

Pork Belly & Puree 有點台式滷肉的感覺，肥廋平均，口入即溶。

Sweet & Sour Fish 相對較失色一味，酸甜汁味道唯好，但脆皮已淋，影響了口感。　　　

「Pork Belly Risotto」很有特式的一道主菜，豬肉是烘乾至脆片，咬落有點像煎脆了的煙肉。

Risotto 混合了芝士，creamy得很，配上脆片肉，真的很新奇，也十分好食，看似小小的一煲，吃畢後卻十分飽肚!!!!!

喜歡台菜，更喜歡這裡的一點新鮮感。加上台灣人待應，感覺又回到台北似的。