其實，我有一班「400歲朋友」(個名點解有D長，擇日再談)，平時好鍾意周圍食....食....食，所以今次我可以去試食，又令我開心左一陣子，因為我地最鐘意係自己食完就帶朋友去食!
拉麵熱已經係香港發燒左一陣子，近起就更加升温，今次我地就飛去名古屋......哈哈!!!其實係銅鑼灣既「麵水」，佢係一間來自名古屋既拉麵店。
相對之前幾間大熱的拉麵鋪，麵水座得舒服好多，全室內之餘，仲唔洗手撞手。
一坐低，我就俾枱面上既配菜吸引左，左手面的的醬青瓜，酸酸甜甜好醒胃，中間係海帶蘿蔔絲，咸咸地少少辣(個人最喜歡)，右手面係勁辣蘿蔔絲，真係辣，有D似泡菜。
之後，我地可以利用呢張Order 紙去決定自己喜歡的口味。
當晚我地有機會試晒三款口味，第一碗係「麵水豚骨义燒拉麵」，佢既湯底係用豬骨煲足12個鐘。呢個湯係名古屋原身的口味，味道比較淡，但又會吸引到你一口一口去飲，而且唔會口乾。而湯底入面既油份亦相對較少，之後同負責人傾開先知，原來佢地會用豬唔同既部份，去煲個湯底，以調節個濃度及質感。
麵水的义燒偏廋，呢個正正啱我口味，因為我由細到大都唔係好食肥肉。义燒雖然廋，但一d都唔硬，而中間部份仍然保持到嫩的感覺，可能同佢係用慢火迫熟有關。
麵水的拉面總共有2個size，而珍寶size只係香港限定，日本同澳門都無(有d特別，麵水日本之後首兩間既分店都係澳門)，大家只要睇下我隻手同罐綠茶，就知佢有幾大，佢既份量足足平時既兩倍。
有時，除左本身食品的配方之外，其實店鋪既配套都好重要，好似左上面既係暖燈，店長話怕有忙起來唔得手，d湯太濃15秒就開始凝固。而下面果兩張就係一個日本制的儀器，佢地會毎個鐘度返佢地既湯底，以保持湯底既濃度同質素。最後，佢地為左保持拉麵的温度，就連隻碗都係熱的。雖然只係少少的舉動，但加加埋埋就好重要。
呢度可以好清楚睇到「麵水」同「特濃」湯底既分別。「麵水」色淡味適中，「特濃」色深味濃。
第二碗試食係「特濃豬軟骨拉麵」，「特濃」同「麵水」真係分別好大。而呢個湯底亦係特別為香港人而設，日本又係無既!呢兩種湯底聞氣上來已經好唔同，「特濃」既香味係影相時已經飄埋來，入口既已經感到湯底的厚度，而佢既骨膠元多到飲既時候會黏住嘴唇，好似飲緊花膠湯咁! 而佢既「濃」同豚王又好唔同，豚王毎一個湯都好搶好濃，而呢個湯係濃得來好温和。豬軟骨骨肉分明，條軟骨仲好脆，啱晒鍾意有咬口既朋友，我就一般啦!
今次除左湯底特濃之外，我地仲試左唔同硬度的麵。呢度既拉麵全部都係師傅用日本的麵毎日親手制成。如果標準的硬度要煮60秒，偏硬則煮50秒，偏軟就要煮120秒。我自己就最鐘意食軟，因為麵身滑d，但又唔會一pat pat 。就算佢偏硬既麵都其實唔係好硬，只係爽口d! 而當日我地因為掛住影相，等左一陣先食，佢既麵都仲可以保持到原有既質感。
最後一碗就係我一食就諗住要帶朋友去食既「地獄拉麵」，呢個湯係係用一半的「特濃」湯底同一半的辣湯底混合而成。我平時都算ok食得辣(譚仔食3小辣)，第一啖飲呢個湯既時候，都真係俾佢搶左一下，d辣味係喉嚨湧出來，不過個味係單調左d。而呢個麵既靈魂就係圖入面用四種日本麵豉調制而成的辣球。將佢溝落辣湯之中，辣味既層次即時提升左。首先，會係麵豉的咸香味，而辣味就溝埋湯底既肉味慢慢出來，辣球入面有d碎肉(有d似炸醬)，唔溝入湯底，就咁一啖麵一啖麵豉，我都覺得好好味!!!
朋友之前係尖沙咀食左碗聲稱「地獄拉麵」，佢話一d都唔辣，我相信呢度可以滿足到佢，因為呢度一個辣球已經食到我標眼水，呢度仲可以加二個或者三個，所以.....我一定會帶佢來挑戰。
講左咁耐，係唔係好奇怪我一直都無提佢既配菜呢，食親拉麵，我都好著重隻「半熟蛋」，記得一次食尖沙咀好出名勁多人排既拉麵時，佢既「半熟蛋」竟然係全熟時，果種失望對於勁鐘意食烚蛋既我，簡直可以用傷心來形容。
不過，呢度既「半熟蛋」真係做得好好，可以睇到佢既蛋黃有好明顯既漸層，所以食落去時，蛋汁真係會流出來，再配合日本空運到港既雞蛋，只可用一句「好有蛋味」來形容!!!哈哈哈!果晚食左n隻，好味!
呢間拉麵店，最特別同吸引的地方反而係「麵水」湯底，雖然佢味偏淡，但我卻最能係入面感受到毎種食物的味道，當濃湯豬骨湯底大行其道時，我反而覺得呢種淡口味係一個唔錯的選擇。
呢間小店係銅鑼灣廣場二期對面，有興趣值得一試。
是日晩餐，由BLOG DB X 麵水提供
