蘋果批變生日蛋糕@波士頓餐廳

好多人都聽過灣仔波士頓餐廳，佢最出名既係火焰牛扒。不過今次我要介紹既係佢既原個蘋果批!

今日係我一個好朋友既生日飯，之前我地見佢買左呢個蘋果批來做散水餅，我地就心郁郁叫佢買來試下。

蘋果批外表好吸引，金黃色啱啱好，負責去拎既朋友話，拎既時候啱啱出爐係香噴噴架!!

生日蛋糕就食得多，但呢個批真係好啱要來做慶足或者一大班人gathering去分享，我地今晚十個人share都覺得好夠分!如果要來做飯後甜品，其實分到十二分都無問題!

切開批後，可以見到一粒粒既蘋果肉，仲有肉桂同提子乾。批餡比較乾身，估計熱食時會較濕潤。蘋果批既味道唔算甜，就連果肉都唔會太甜，而批皮厚薄適中，有少許牛油味，不知不覺間就已經ko晒!

雖然呢個批唔係傳統既蘋果批，但佢好有以前舊式餅鋪既懷舊感覺，加上只係幾十蚊，所以得閒換下口味，我都覺得係唔錯既選擇。聽講佢仲有雞批，下次試埋先!