「阿女去那兒」媽媽自由行@台北、宜蘭---出發第一天

DAY1(19/12)  : 香港----台北-----宜蘭縣礁溪

華航7:55 起飛，九點幾就準時到達!!(好多人都唔敢搭華航，其實我出發前都有擔心，但今次都OK，起飛同降落都好穩定)

到達機場後，唱埋錢(當日1:3.7)，梗係攪左上網先啦! 辨理上網既地方好易揾，出閘後轉右手面就係，由於無做功課，唔知邊間好D，唯有幫親最多人果間。(幾過幾日既使用，台灣大哥大係好穩定，係宜蘭縣無斷線，而係青桐就有少少斷線既情況，我只係用緊HTC ONEX ，我覺得上網既速度快過香港。後來撞到一對香港夫婦，佢地話遠傅都OK(佢地用IPHONE)

櫃台的職員好好，會幫你插咭試埋。仲會用透明袋幫你放好香港張SIM CARD!!!

攪掂之後，我就直出台北。不過由於拎於兩個喼，所以我預先問左台北間旅店，先寄存一個喼，所以就用送既車票直到雙連站。(我覺得呢個決定太明智，因為去到鄉下始終都有樓梯，放低一個喼，真係輕鬆好多)

原來我已經好耐無到台北，連機場已經變左都唔知，宜家除左大左靚左之外，仲有好多貼心既設施，好似有好幾個义電既位置，等車來既時候就可以用。

 有關雙連站同台北旅店遲D先介紹。放低行李後，我地就立刻搭捷過去台北車站，諗住食完午飯後，就入宜蘭。

台北既捷運呢幾年應該增加左好多扶手電梯，記得我第一次同太后去時，佢真係上落樓梯上到怕。過左幾年太后既腳就梗係差左，所以出外，我第一件事就係揾電梯或者扶手梯。今次係台北既時候有九成既站都有電梯，有時雖然要行遠D，但對於老人家來講，佢地上少一條或者落少一條樓梯已經差好遠(捷運站出口有寫明邊D有電梯，大家可以留意留意!)

要搭捷運方便D，梗係買定張悠遊咭(好似香港既八達通)，只要係自動售賣機買就可以。

由於我今次真係無咩做功課，只知係台北轉運站就可以搭到去宜蘭既客運。不過大家可以放心，只要出站後跟住指示就好易去到。台北轉運站係京站商場隔離，所以我地就落去京站下面既FOOD COURT 食午餐。

第一餐，我地選左地道既台式鐵板燒，味道一般，價錢好像六七百台幣吧!
食飽後，我地就過返隔離既車站，原來搭葛瑪蘭客運，唔洗係一樓大堂買飛，只要上到4/F就可以即買即走。

 大概一個鐘之後，就到達礁溪了!!落車第一個感覺係.......都幾旺喎!!!好多連銷店都有，但人就唔多!

落車兩邊有唔同既商店，行到底就會見到礁溪火車站，火車站前有一個温泉池，俾遊人浸腳，好有風味，果然係温泉之鄉。

我去到當日其實都好凍，得十一二度。見到朋友推介一定要飲既蕃茄汁，都忍唔住買左杯試下。又真係好好飲喎，無咩蕃茄既「聲」味，又甜甜酸酸咁，真係幾好飲!如果夏天來應該會飲多幾杯。

HEA左一陣，我地就CALL民宿既職員來火車站接我地，第一晚我地住係「奇立丹、宿食湯」。呢間我之前睇左好多BLOG，絶對係俾佢房內温泉既景色吸引左，加上一晚連早餐，只需要$2800台幣，我同太后都好滿意!!

佢張床功勁大，我同太后兩個人一人訓一邊中間都仲有好多位，而房間空間感都好好，加上房間係地下，啱晒太后，唔洗上上落落!

而佢既浴室係勁大，旁邊有沖身既地方，真係好似去左日本咁! 温泉池兩個人一齊浸都有找，而佢既温泉水係天然的，所以會感受到水的質感好滑，浸完皮膚都滑埋。

宜蘭相對還是鄉下既地方，周圍都好多稻田，而奇立丹就係用日式庭園做設計。太后好鐘意，因為唔洗見高樓大廈之餘，仲令佢諗起好多佢以前耕田既事。平時係香港，我地真好少有耐性同有時間咁様兩母女去傾偈!!

雖然下著雨，我地就咁傾下傾下行返出市中心食晚飯，由奇立丹行出去大概要二十至三十分鐘，但車程就十分鐘都唔洗!!如日頭大家都可以行下，或者借佢既單車，但如果夜晚我都係建議CALL 的士(記住宜蘭好少的士係條街度，所以通常都要CALL，同埋佢起標係$140台幣，貴過台北好多，所以我初時都預左要洗唔少錢的士度)

行到大街後，沿住春天旅店向上行，就到抵達晚飯既地點「添喜海鮮小吃」。宜蘭都幾有聖誕氣氛!!

呢間小店係我爬台灣BLOGGER找的，當晚我去到時間尚早，見到好多都係台灣人，而店面亦似係做街坊生意。佢主打係賣海魚及創意小食。大家可以去門口的雪櫃點喜歡的魚。當晚我地食最貴就係條魚，好似係$390台幣。我地選左煮湯，佢加入左勁多薑絲，但都仲飲到魚湯的鮮!

我另外叫左佢出名的日式白苦瓜，好好味!!仲有炒臭豆腐，呢個我都鐘意食，酸酸甜甜的!
太后就欣賞青菜同魚湯。最後呢餐食左八百多台幣(其實我地叫多了，食完勁飽)

食完之後，我地就行返落大街，去到湯圍溝温泉公園，見到D温泉真係勁熱，亦有唔少人係度浸腳，好悠閒呀!

温泉公園對面就係好有趣既温泉拉面，可以浸住腳食拉面。旁邊就係奕順軒，入面有最出名既卷蛋，仲可以試食TIM!!!而温泉公園既左手面就係「葉家香」既香脆椒，佢地係賣由辣椒做成既產品，除左好有趣既辣椒雪糕外，仲有原粒辣椒烘乾既小食，呢個真係好好味，頭兩粒你唔會FEEL到辣，但食多幾粒就開始出事，大家去到礁溪真係要試下。

由於第一日唔知要CALL的士，好彩遇到街邊有架的士泊係度，所以先返去民宿。返到民宿先至九點，咁我地梗係開始享受温泉，之後就一覺訓到第二朝!!

同阿太后出去，我通常都唔會太晏返酒店，因為阿媽級既體力真係唔及大家，而佢地又會怕D後生唔盡興而唔出聲，所以大家就要識做，唔好要佢地太辛苦!!